हे चिंचेचे झाड दिसे मज चिनार वृक्षापरी
दिसशी तू, दिसशी तू, नवतरुणी काश्मिरी !
बघ निळसर पाणी झेलमचे झुळझुळे
हे गवत नव्हे गे पिवळे केशर मळे
ही किमया केवळ घडते प्रीतीमुळे
उघडे डोंगर आज हिमाचे मुगुट घालिती शिरी
रुसलीस उगा का जवळी ये ना जरा
गा गीत बुल्बुला माझ्या चितपाखरा
हा राग खरा की नखर्याचा मोहरा
कितीवार मी मरू तुझ्यावर किती करू शाहिरी
हर रंग दाविती गुलाब गहिरे, फिके
तुज दाल सरोवर दिसते का लाडके
पाण्यात तरंगे घरकुलसे होडके
त्यात बैसुनी मधुचंद्राची रात करू साजिरी
गीतकार: ग.दि. माडगूळकर
संगीतकार: एन दत्ता
गायक: महेंद्र कपूर
चित्रपट: मधुचंद्र
कोणत्याही टिप्पण्या नाहीत:
टिप्पणी पोस्ट करा